برضُه عادى….أحمد كريم…مصر

برضُه عادى….أحمد كريم…مصر

لمّا تبقَى الدُّنيا فيها
ناس حَويطَه وناس سفيهَه
ناس بتكدب لجل تعلا
وامّا تنطق بالحقيقه
تبقَى واحد مِ الأعادى…
يبقَى عادى
لَمّا تحلم حلم عُمرَك
ثُمَّ فجأه تلاقِى عُمرَك
زَىّ حَبِّة مَيَّه خِلصُوا
بين صوابعَك السَّاعادى..
برضُه عادى
لَمَّا تحلم يوم تعيش
ثمَّ تصحَى ماتلاقيش
لمّا يبقَى الصَّخر هِيش
والحجر زَىّ الزَّبادى…
برضُه عادى
لَمّا تبقَى العَتمَه فَرض
وانت صوتَك تحت أرض
تيجى تصرخ يمنعوك
وان حاولت يكَتِّفوك
تمشى مكتوف الأيادى…
برضُه عادى
إوعَى تعلن إندهاشَك
أو تكون بالكلمَه بادِى
حُط صوتَك بين ضلوعَك
قول لنَفسَك: كلُّه عادى
برضُه عادى