كل واحد فيه اللي مكفيه و لكن
ـ قلم أسـمـاء الـبـيـطـار
نخرج شوية من المود اللي إحنا فيه ده و نرجع لموضوعاتنا الإنسانية
اللي أكيد كلنا فينا جزء منها أو بنحس بيها .
صحيح كل واحد فينا فيه اللي مكفيه من جميع جوانب الحياة ، و في ناس مننا ربنا اللي أعلم باللي فيه ، قافله على نفسها و على حالها و محدش حاسس بيها ، و لا هي محسسه حد باللي فيها ، لأنها عارفه و متأكده إنها مش لوحدها ، في دوامة الحياة و مشاغلها و مشاكلها ،
و ناس تانيه ما بتقدرش تتحمل اللي بتمر بيه ، ما عندهاش طاقة تشيل لوحدها كل الأعباء اللي فوق كتافها دي ، بتبقى يا دوب محتاجة إنها تفضفض بس ،، آه و الله تفضفض بسسس .
و من هنا يبدأ موضوعنا .
في ناس دايرتها محدودة جداً
من ناس ،، لتجارب ،، لمواقف ،، لأزمات ممكن تمر بيها لأول مره في حياتها ،، لحاجات كتير من أمور الحياة الطبيعية اللي ممكن كلنا نمر بيها .
الناس دي بالذات لما تييجي تفضفض معاك باللي فيها
ما تستقلش بكلامها ،، و لا تحسسها عفواً ” بهيافة ”
اللي بتحكيه
و ما تدخلش معاها في سباق إنك إنت كمان فيك ، و فيك ، و إن اللي بيقوله ده ما يجيش حاجة في اللي مريت بيه !!
و يا سلام بقى على نوعية تانيه من الناس اللي بتسمع و تفكر إن المشكلة اللي بيحكيها الطرف المسكين ده إنه محتاج مساعدة مادية !!
أبداً ..
هو مش محتاج منك غير إنك تسمعه
غير إنك تريح قلبه بكلمة طيبة
غير إنك تقوله هو صح أم غلط
غير إنك تنقله تجارب بطريقة غير مباشرة توسع بيها دايرة خبرته
أو تحط قدامه الحلول بطريقة بسيطة ، و متكركبش الدُنيا فوق دماغه
حقيقي لسه في ناس بسيطة،، و بتتعامل ببساطة
مش بتعقيدات العالم اللي إحنا عايشين فيه
و مش محتاجين مننا غير قدر من الرحمة و الإنسانية .
و إن يبقى قلبنا على قلب بعض و لو بأبسط الأمور
إنك تسمع ،، و تطيب ،، و تراضي .
حاجات بسيطة …
لكن صدقني بتطلع منها إنسان لبر أمان
بتنشله من حالة ضياع ممكن تنقلب بيها حياته رأساً على عقب
و علشان نبقى واضحين زي كل مرة بنتكلم فيها .
كلنا محتاجين حد يسمعنا اللي عنده خبرة قبل اللي ما عندوش
صحيح اللي هنقوله مش هيزود و لا هينقص .
لكن هيريح نفس ربك اعلم بحالها .
و يمكن اغلب المشاكل النفسية اللي بنمر بيها إن ما فيش حد بقى يسمع لحد .
التعليقات مغلقة.