تخلص منها في أقرب موقف
بـ قلم أسـمـاء الـبـيـطـار
دايما في علاقات بندخلها و من البداية بنحس بقلق ، بعدم راحة ،
في حاجة تقيلة على قلبنا لكن مش عارفين هي إيه ، مش مبسوطين ،
و احاسيس كتيرة من هذا القبيل ……
و أكيد أغلبنا بيحس بالشعور ده في بداية بعض العلاقات .
لكن الغريب إننا بندوس على كل ده و بنكمل !
و الأغرب إننا بنعدي مواقف مينفعش تتعدى ، تحت أي مسمى بقى مش فارقه !
لكن اللي الواحد متأكد منه إن الواحد بيدوس على نعمة ربنا مديهالوا
نعمة الإحساس .
طبعاً حد لازم يقول و انتي إيه عرفك ما يمكن يطلع الإنسان ده كويس و يخيب ظنك و و و و طبعاً عنده حق .
و كنت أتمنى حقيقي إن الإحساس يخيب !
لكن في أغلب الأحيان إحساسنا بيطلع صح بنسبة كبيرة .
في علاقات بندخلها من البداية بتلاقيها قايمة على ..
_ النديه
_ الحذر الشديد
_ المصلحة
لكن اللي المفروض يحصل إن أول موقف يحصل و اللي قدامك يأكد إحساسك خصوصًا في العلاقات اللي ذكرناها دي يبقى من فضلك تخلص فوراً منها لإنها للأسف أمراض .
و ما تصبرش لموقف و اتنين و تلاته لحد ما تلاقي نفسك طالع
بعاهة نفسية ، عاهة تكرهك ، تخوفك ، و تشوه صور باقي العلاقات قدامك .
و صدقني عاجلاً أم آجلاً العلاقات دي هتنهيها و هتتخلص منها للأبد
و هتحس إنك فوقت لنفسك يمكن يبقى متأخر شوية لكن المهم تفوق
و يمكن تشوف قدامك ناس ما كنتش شايفها قبل كده .
ناس مصلحتها إنها تشوفك بخير ، تدفعك لقدام مش ترجعك لورا ،
تخليك ند لنفسك علشان تتقدم .
الدُنيا لسه فيها الخير بس المهم إحنا نشوفه و نحس بيه .
ديماً الأوان مش بيفوت طول ما إنت مش بتعاند إحساسك .
التعليقات مغلقة.