“فَراشة بَالِفّ على عودي”…شعر سيدة القصاص

“فَراشة بَالِفّ على عودي”…شعر سيدة القصاص

تعالى يا بويا كلمني
من البرزخ
ومن عالم سكنته
هناك
تعالي احكيي لي
أيه بيحصل
ياريت تفتح فيما
بينَّا
شراع…. شباك
أنا نخلة وراح
زولها.. من
المكتوب
علي جبيني
وكل دقيقة
باستنى
تناديني
وباتسوَّى على
تنورة
الخشية
وباسْتلْقَى على
فَرْشِة
دواويني
ولا الدنيا
مصلحاني
ولا الآخره راح
أضمنها
أنا عاوزاك
تاخدني معاك
مانيش عارفة هنا
أتأقلِم
علي ظروفي
وغرقانة
في نار خوفي
وحيرانة
ما بين قلبي
وبين ناري…
وجَنبي
مَلّ مسماري
يابويا تعبت
باترجاك
فقُل لي كلمة
ترضيني
تصبرني علي
سنيني
أنا مشوية م
الأفكااار
كأني
جوة حلقة زار
كأني
راكبة مرجيحة
بِنَافْ دوَّار
حياتي جثة
مركونة
في حوش الدار
ماهو إنت كنت
“نَيْسَاني”
وجوه ف… قلبي
ليك سلطان
ساعات بَحِسِّني
مَلَكَة
وساعة بَحِسِّني
شَيطان
وبارجع تاني
بالْقَاني
يادوب إنسان
فراشة بالفّ
على عودي
ف رقص باليه
وتسأل روحي
من تاني
بجد أنا ليه؟
مُنَايَا أترسَّي
ع المرْسَي
باخاف واحْذَر.
لكن إنت ف
قلب السِّر
ومهما يكون
مابينا البِرّ فمِش
هَاتْقِر
خلاص بكفَاية
وسَامحني
أنا هايباك
وباتشعبط ف يوم
لقياك
خلاص… باعفيك
خلاص توبة
ماعدتش أعيد
ف دي النوبة
وازيد ف أساك.
هاعيش
عاللومة طول
عمري
واخللي الرهبة
تكويني
ليوم الدين
ليوم على شطُّه
نتقابل
ونلْقي المرسي
والشِّباك
لعل المَولي
يِنْجيني
ما اشفش هلاك.
وأكون وياااك
نطير نسبح ف
قلب السر….

.