بيت ابويا
راحيل أبوزيد
يابيت ابويا ياهمي الكبير
يابيت أبويا واحشني كتير
ياحزني.. يافرحي…. ياسهر الليالي
ياضحكه بقلبي صداها بيلالي
ياضفيرتي الطويله
آ ياكعبي العالي
ياسحور رمضان
ياليلة العيد
ياكحك …يافته
يالبسي الجديد
آه يادنيا كبيرة مابين الحيطان
يالعبي وشقاوتي
ياليالي زمان
يابيت ابويا كبرت خلاص
ولبيت غيرك روحت اعمل أساس
لجل اجيب بنوته
وتقول دا بيت ابويا
ياهنايا فيه انا واختي واخويا
وفجأه
الاقي بياخدني الحنين
ويدوسني بقسوة قطر السنين
وادور علي ريحتك في البيت والحاره
فتملي حلقي وروحي المراره
واصرخ بحسره…. آه ياألف خساره
لا دا شارعنا…. ولا دي العماره
يابيت ابويا ياغالي عليا
ضاعت وياك عيشتي الهنيه
أيام ماكنت فيك لسا صبيه
بتحلم تسيبك في ليلة عيد
وتروح تعمر بيت جديد
وما كنت اتخيل ولا يخطر ببالي
اني داخله زنزانه قضبانها حديد
جوه سجن ضلمه وسوره عالي
يابيت ابويا يافكره ببالي
يابيت ابويا واحشني ياغالي
التعليقات مغلقة.