صحيح يا ولاد العشق موت …الشاعر بكري جابر
صحيح يا ولاد العشق موت، ربنا يحفظك يا أم الكون
و لإنك …
آخر غصن ف شجرة قلب الولد الطيب
أول خطوة ف عتبة بكره التايه مني
متحرمنيش ….
منديلك الابيض
زي ما هو ….
محدش شافه ف شنطة عمري
غير انتِ وبس ….
وسط الزحمه
وأيام كَحله
و ناس ب تبيع الحب صناعي
ب افتح قلبي و ابص عليك
نفس الضحكة
ونفس الكُحلة
و نفس الرمش العاشق قتلي
شئ مش عادي
حتي ضفايرك
شئ مش هادي
رغيف والكل بياكل فيه ….
و انا مش فيه … !!!!
قمح الروح مخبوز … على صهدك
حتى الكاس من دمعي ندهلك
مهما حاولت …..
و قولت انا ماشي
بارجع تاني و اقول حنيت
ضي الشوف من عيني لعينك
قمح الروح من قلبي لقلبك
خُديه
و كُلِيه
التعليقات مغلقة.