…….. كل أسئلتي ……..
معوض حلمى
……………………………
سألت الروح عن الفرحه
بقالها مده نسياني
وسايبه الظنون سارحه
مع الأوهام وجرحاني
ومش عارف ..؟
أنا المجني أم الجاني
وهى حبيبتي عارفاني
وقرياني كأني كتاب
و شيفاني باهب هباب
وحرماني العتاب واللوم
وسيباني الويلين ويلي
تايه ويا تأويلي
ع المروى اللي على الصوت
ع الزارعه اللي شقت موت
ع التوت اللي صابه مرار
ع الجار اللي سد الدار
ع النار اللي داست دوس
ع الرعب اللي في الفيروس
ع الساقيه اللي واقفه تهاتي
ع الترعه اللي ناشفه يوماتي
على اخواتي يطول الشرح
ع اللقمه بنرمح رمح
ع القمح اللي لسه ماطاب
ع السكه بقينا اغراب
ع الباب اللي مش مفتوح
ع العمر اللي عدى جروح
ع الروح اللي ماتت خوف
على بكره اللي جاي مكسوف
ع الشوف اللي راح م العين
ع القلب اللي عبى آنين
على قلبك وزايد صد
وناديتك ماجاني الرد
وسيبتي الحيره واخداني
ورا الاشواق ورمياني
وانا البردان تضميني
وادوب منك في تكويني
وبعد عنيكي يكويني
وانا ع العهد عارفاني
وعارفه كل ألواني
وعنواني ف عينيكي ميدان
ياملهمتي
ياحافظه كل تفاصيلي
وعارفه كل اسئلتي
فاليه ميلتي
وانا المشتاق تجاوبيني
وانا المشتاق تجاوبيني
…………………………..
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.