قلب أمك
بقلم مدحت رياض
لما قالوا إبني مات
انكسر عمري في ثواني
كل يوم من عمره فات
وانطفت أحلام زماني
الكلام كان سيف بيوجع
والدموع واقفة ف وريدي
أصله كان قايل هيرجع
والفطار هيكون بإيدي
كنت بحسب كل ساعة
بس كان القلب خايف
كنت حاسة بطعم غربة
أيوة قلب الأم شايف
بكرة هعمل له الكنافة
والسحور جنبه القطايف
الصيام من غيره رحلة
والوصول دقة كفوفه
لما ييجي في مرة فجأة
يبتسم والعين تشوفه
إبني يا أغلى الحبايب
ابتسامتك زاد سنيني
لما بتكون إنت غايب
قولي هعمل ايه يا قلبي
لما توحش قلب أمك
وأما أحس العمر رايح
وأحضنه وقت أما اضمك
وأما أحس الدنيا مالت
تتعدل من عزم عِندك
طعمه إيه يا حبيبي قولي
الفطار في الجنة عَندك
التعليقات مغلقة.