تمن الغربة بقلم بنت مصر سولافا بسيوني
يا مسافروفايت
وراك أحباب
شكل الأيام
بقى لون واحد.
والفرحة ما
زارت الأعتاب
الحزن كل ما
فيها واخد.
واتقفلت كل
الأبواب.
كان فرح
و غاب.
ما هوا دا
تمن الغربة
شباب ضايع
عمر بيفنى
شايل هموم
على اكتافك
ولو صاحبك
في يوم شافك
بتتوه من عينه
أوصافك ويلاقي
كل شعرك شاب..
قولي جنيت
إيه من الغربة؟
دا بيوصفوها
بالكربة
مرار أيامها
ليه شاربة
نهار شقي
وليلها عذاب
كفاية البعد
عن الأحباب
وقلب أمك
يشيل همك
يزيح الحزن
ويضمك
وصاحب وقت
ماتعوزه
يكون جنبك
وعمره ما غاب.
مشاعره صادقة
مش كداب
ولو زعلت يوم
منه بيبتديها
لوم وعتاب
عشان أحباب.
أخدت إيه
وإنت بعيد؟
دا مال الدنيا
دي مايفيد
دا حتى بتيجي
ليلة العيد
و دمعتك
تحرق خدك.
وحاسداك
العيون
رصداك
و بتقولك دا
مين قدك.
ومين كان
صانك وودك.
ومين لساه
ماسك إيدك
تملي يداري
على عيبك
وعمرالظن
بيه ما خاب.
خليك ما
تمشيش
من هنا
اليوم في
بعدك بيفوت
سنه.
ولاتسوى فيه
لحظة هنا.
تقضيها وتكون
وسطنا.
لو عد يوم
من عمرنا .
في الغربة
ماتحسبلوش
حساب.
أيامها رايحه
ومنسية
مفيهاش أمل
ولا حنية
بتفوت كدا
ومعدية
بتضيع هدر
وبدون أسباب
والإسم غياب.
التعليقات مغلقة.