ماسبيرو رمضان
بـ قلمي /أسـمـاء الـبـيـطـار
بدون مبالغة رمضان فعلاً كان زمان ، و حقيقي بروحانياته قبل مظاهر الإحتفال بقدومه من أول الشارع و تعاليق الزينة ، إلى أن نصل إلى برامج إتحاد الإذاعة و التليفزيون .
و من بعد آذان المغرب و إحنا متجمعين حوالين السفرة أو ” الطبلية “
علشان نسمع المسلسل اللي في الراديو ، كأننا شايفينه، و حسينه، و عايشين جواه
إلى برامج المسابقات العلمية و جوائزها مع طارق علام في منتصف النهار
و برنامج عمو فؤاد و تشغيل العقل و البحث عن المعلومة .
إلى برنامج بوجي و طمطم و عم شكشك .. و الأصول اللي قدموها في صورة مبسطة إتعلمنا منها كتيييير ..
و يمكن منساش حلقة ” بطني بتوجعني آه يا بطني ”
طبعاً من كتر الأكل و رد طمطم عليه
” ب حرمت يا بوجي .. حرررمت ” صحيح قُدم في صورة عرائس لكنه غرس فينا الكثير الذي لا يُنسى .
دا غير المسلسلات الإجتماعية من الدرجة الأولى
و الفوازير اللي الكل كان بيتجمع عليها الكبار قبل الصغار .
كتير من البرامج اللي اتحفرت جوانا و مش قادرين ننساها لحد دلوقتي
حتى المسلسلات اللي كانت باللغة العربية الفصحى كنا بنتفرج عليها .
و الجميل حقيقي إننا كنا بنردد الجمل بالفصحى لإنها كانت حاجة جديدة علينا و كنا حبنها جداً جداً ..
تخيل بقى لو كام مسلسل من دوول أكيد لغتنا الأم كانت هتبقى أصل و مش غريبة !!
على فكرة التليفزيون ثروة قومية ، و قيمة ثقافية ، و تعليمية مهمة جداً جداً .
إنما دلوقتي قبل عرض أي مسلسل و الجملة المشهورة
” ينصح بعدم مشاهدة المصنف لأقل من +18 “
عارفين معناها إيه ، يعني توقع أي مشاهد مُخله بالآداب العامة ،
أو العنف الأسري ، أو المجتمعي ، أو أو أو
و أنت و نصيبك بقى ؟!
لما تلاقي مسلسل .. بيحببك في الإدمان ؟!
و طريقة الحصول عليها ، و اخدها، و النشوة و حالة السعادة اللي الواحد بيبقى فيها ؟!
و العلاج حاجة بسيطة جداً و لطيفة و مستشفى شيك وواحد قاعد في هوا نضيف و خلاص ¿
يعني زي بالظبط اللى عنده نزلة برد و يمكن أقل ¿¿¡
كان بابا الله برحمه جه في فترة و بقى يقول :
التليفزيون ده خسارة فيه شوية الكهربا .
و حقيقي كان عنده حق و يمكن مش لوحده اللي شايف كده .
و يمكن أنا بدون مبالغة مقاطعة جميع برامج التليفزيون و الفضائيات من 2011
ما عدا برامج الطبخ .. اللي حتى بتفرج عليها فقط من غير تنفيذ .
و بعض الدوشة اللي بيعملها لما تبقى الدُنيا سكاته .
لما حقيقي بقى عندي جهل بالكثير من الأحداث ، و معرفة بعض الشخصيات الفنية و الكروية و السياسية .
و يمكن علشان أكتب مقال عن بعض الأحداث لازم أقعد اتفرج علشان الملم بعض الأحداث إحتراماً للقارئ .
آه صحيح بمناسبة جهلي بالأحداث ..
كان د / أحمد دبيان
منزل مقال مره عن ” نيوتن المصري ”
كان الحدث ده مالي الدُنيا يمكن من شهر تقريباً .
و لكني ظننت انه حدث قديم و علقت على مقال الدكتور علي هذا الأساس ؟!
أحياناً نُجهل رغماً عنا .
التعليقات مغلقة.