عرافة أنا …بقلمي ناهد الموجي شاعرة مصرية
انا أصلي.. عرافة
للبخت شوافة
تعالى ابصر لك
والحلم أفسرلك
اليوم دا يوم عيدك
وتعالى هات ايدك
الكف فيه خطين
الخط فيه شطين
ومن البنات اتنين
واحدة كحيلة العين
والتانية زينة الزين
وخط طول العمر
طويل ولا بيمر
ولا فهش طعم المر
ارمي بياضك هات
عندي كتير حكايات
الرمل بحكيها
وهعرفك بيها
طريق سفر مشروع
وريحان عليه مزروع
وفى اخره فيه ينبوع
وصحرا برويها
مكتوب على جبينك
صبية من جينك
بين الهوى وبينك
لما يحين حينك
بنتك وربيها
قال الودع يالجدع
كلام جنابك بدع
قلب الصبايا صدع
شاطر ف صنع الخدع
وانت اللي باديها
بيقولي بحرك غريق
لكن لصاحبك صديق
بتسنده فى الضيق
ومهما يعلا الحريق
برجولة تطفيها
عرافة انا بأمان
لارمل ولا فنجان
قارية العيون بحنان
وكل شئ بيبان
من نظرتي فيها
التعليقات مغلقة.