ست البنات … علي قاسم مصر
آه ياست البنات
عروسة مزيونه
رغم الأفااات
فيك الحرامي والضلالي
واللي مش لاقي الفتات
وفيك اللي ناسي أصله
وهو فلصه
وصاحب صاجات
واللي شايف نفسه عمده
ابن عمده ابن عمده
وبيضرب شيكات
واللي شاري أصوات بلدنا
من زمن العاهات
كان حالف يوم ما يكبر
ويشوف الأهاااات
يبني مشفي يبني جامع
ويقضي الحاجات
طلع كلام الليل مدهون بزبده
وساح ف الساحات
كل همه ينام شويه
و ياخد سلفي مع الحالات
كل همه جمع قرشه
ملى كرشه
من غزل البنات
آه ياست البنات
عروسة زينتها الأهات
والكحله في عينيك ساحت
من كتر العياط
والشعر الحرير ابيض
وشمَّتي الخالات
كان خيرنا عليهم سادد
أفواه الولاد
كان خيرنا عليهم كاسي
العود و النبات
معلهش ياست البنات
بكره النور يشقشق
من رحم الأهات
بكره الليل يولي
وتنكسر الصاجات
بكره العقل يكبر
ونعيد الأمجاد
بكره جبينا يعرق
ونعيش فى نبات
بكره النيل يزغرد
وفي ايديه الفرات
بكره الشمس تغني
عروستنا ست البنات
التعليقات مغلقة.