مهره …كلمات حسني مهدي
مهره بتتعايق !!
ف عيونها غزلى آني
من كحلها الرايق
بالرمش شاغلاني !!
شوفت الجميل ماشي
روحي راحت مني !!
عيني ما نايماشي
طيفه مسهرني !!
تفاح يا ناس طارح
ياما احلا لون ورده !!
شعره الحرير سايح
هفف على خده !!
الفكر فيه سارح
عشمان ينول وده !!
البحر لو مالح
يحلا ف كفوف يده! !
شبكني من نظره
وأرضى اللى كانت بور !!
صبحت قوام خضره
وفيها سواقي تدور !!
أصل الغرام بذره
تطرح جناين نور !!
يحلا معاه بكره
أجمل بنات الحور!!
آه من رموشه سهام
رماني بيها الشوق !!
خدني من الأيام
خلا غروبي شروق! !
ياضحكة الأحلام
بيكي زماني يروق!!
أغرق وانا العوام
والقا عينيكي الطوق!!
ارويني من نهرك
يا مهره انا عطشان!!
لو قلبي كان مهرك
تاخديه وانا الكسبان !!
تايه ف ليل شعرك
مستني قمري يبان !!
إحساسي بمشاعرك
خلا الحروف بركان .
التعليقات مغلقة.