القربة مقطوعة
سامح لطف الله
شيطان وبيطبل
طبل على طبلي
قفلت له وداني
لما البعيد جاني
والعفو للجاني
سرَّك يا واد باتع
في دَخْنة الحضرة
عفريت بيتأمركْ
سلمتلُه أمركْ
والصَّب ف وداني
مَصْلَحْ ولو فرخة
أهي برضو سبوبة
والطوبة معطوبة
والطوبة فوق طوبة
والعركة منصوبة
على ورك م الفرخة
والواد على صرخة
تزعق مصارينه
والفقر بالعينه
على معدة م الفاضية
إعلن خلاص فوزه
بضربته القاضية
والبنت مش راضية
تفرح بفستانها
السن مش كامل
راميينك الرامية
يا أرنبة عمية
بتفتحوا عنيها
ولا ليها ولا بيها
وتكركر الجوزة
ملعون أبو العوزة
بتزحلق الموزة
رجلك ماهيش ثابتة
والتالتة قال تابتة
والرابعة ف الموتة
احكي لنا حدوتة
للضلمة هتنور
ولدمي هتفور
الضغط يركبني
ووداني هتطبل
شيطان وبيطبل
طبل على طبلي
من إمتى كان طاب لي
والقربة مقطوعة
سامح لطف الله
التعليقات مغلقة.