أسبوع الإنضباط قلم أسـمـاء الـبـيـطـار
نحكي حكاية بسيطة كدة زي ما تعودنا و بعدين ندخل في موضوعنا .
يمكن جيل ولادي مثلاً ما يوعاش على الكلام ده لكن لازم كنت احكيه لهم .
إحنا كجيل السبعينات و الأجيال اللي قبلنا إتربينا بالنظرة .
يعني إيه بالنظرة ؟
يعني كنت أفهم أمي أو جدتي عوزة تقولي إيه من غير و لا كلمة .
يعني مثلاً ..
لما يبقى عندنا ضيوف ، في نظرة قومي إعملي الواجب .
و نظرة تانية قومي ما تقعديش وسط الكبار .
و نظرة تالتة لو هتقعدي ما تدخليش في الكلام .
و نظرة و نظرة و نظرة .
و دا كان إسلوب و طريقة تربية فضلت ملزمانا طول عمرنا
يعني بكل بساطة دا قانون البيت عندنا .. و نحط تحت قانون دي عشر خطوط .
يعني مش إتعلمناها أسبوع و خلاص خلصنا على كده .
لا دا نظااااام فضلنا ماشيين عليه و مش ممكن حد يخل بيه .
ندخل بقى في موضوعنا بعد المقدمة دي .
لما كنت مسافرة برة مصر كان في حاجة بيعملوها إسمها شهر الإنضباط المروري .
و شهر لأنها رابطة لمجموعة دوول مش دولة واحدة فقط .
لكن بأمانة هو كان الإلتزام و الإنضباط طوال العام .
يعني إستحالة نتحرك خطوة بالعربية إلا لما نشد حزام الأمان .
ممنوع الموبايل .
الإشارات ليها إحترامها .
السرعة بقينا اوتوماتيك عارفينها .
الجانب الأيسر و الأيمن من الطريق و سرعة العربية فيهم .
و إستحالة تلاقي عربية بها خدش أو زجاج مكسور ، فوراً رجل المرور في أي وقت بيوقفك و يسألك ؟
اولاً .. عن سبب هذا الخدش أو الكسر .
ثانياً .. بتتعهد أمامه إنك هتصلحه في أقرب وقت .
علشان كده كنا إستحالة نلاقي أعطال سيارات في الطريق .
أو سيارات شكلها مريب أو مش طبيعي .
و بصراحة كانت ميزة مريحة جداً جداً .
المهم .. الشهر ده كانت بتزيد الدوريات ، و التفتيشات على الرخص
و خلافه .
لكن عندنا هنا اسبوع واحد فقط للإنضباط المروري !
طيب و دا يلحقوا يعملوا فيه إيه ؟
و حقيقي كتير من الناس بتلف حوالين نفسها في الإسبوع ده خصوصًا لو مصدر لأكل العيش .
و حقيقي تكلفة لا تتخيلوها .
القوانين و التشريعات أساسها التفعيل طوال العام .
النظام لابد أن يكون حاضر في كل وقت و اي وقت .
لابد أن نكون دائماً على إستعداد .
مش مُجرد مخالفات للسرعة .
أو إنضباط في إمضة داخل المؤسسات العامة و الخاصة .
حقيقي النظام تفعيل ، و إستمرار متابعة ، ثم تعود و إنضبااااط
التعليقات مغلقة.