أنا معرفكيش بقلم مدحت رياض
أنا معرفكيش
موش قصة شكلك وملامحك
ولا هبعد أو قلبي مسامحك
ولا إسمك والقلب وشمعة
والسهم هناك عند التوتة
القصة اني معدتش عاوز
أستنى لاخر الحدوتة
والشمعة تطفيها الدمعة
كلمتك ياما وموش سامعة
الصبر ده موش دايما باقي
ولا زيه هتفضل اشواقي
واديكي وصلت وهتلاقي
في عيونك نظرة بتندهني
ومهزتنيش
صدقتي كلامي اما بقولك
أنا معرفكيش
النيل بيعاتب في خطاوي
مشيت لك ياما على هواكي
لعيونك كان أصلا غاوي
ماهو زيي اتحمل في قساكي
ماهوشاهد ياما استنيتك
بعيون درويش
وغزلت من العمر غناوي
والناي بكيته وكان ناوي
يهرب ميجيش
صدقتي كلامي اما بقولك
أنا معرفكيش
فدادين الحب المزروعة
في جدور الروح
من صدك صبحت موجوعة
ومجبورة تبوح
وياريتها الآهة المسموعة
بتداوي جروح
عدبتي مواسم حرماني
وسنيني عجاف
والقلب اتحمل أحزاني
ما هو كان خواف
لا يعدي الري وفي معاده
الزرع مفيش
واهو راجعة بتستني بشاير
غالية مهتجيش
ازاي هتلاقي حصاد عندي
لو مزرعتيش
صدقتي كلامي اما بقولك
انا معرفكيش
التعليقات مغلقة.