شنجى “من ديوان شهيد”
بقلم محمد على محمد حماد
واقف هنا شنجى
بابعت لامى سلام
بابعت رسالة أمل
مليانة شوق وهيام
وها قولها يا امى
عبرنا نحو الامل
هدمنا جسر الضلال
هدمنا خط الخرافة
والغدر والاوهام
وف عرسك الموعود
عبر القناة ابطال
مش بس كانو جنود
كانوا اسود ورجال
وف وسط نار المعارك
والحرب والغارات
كانت لهم ويا الردى
حكايات
ادى ابراهيم الرافعى
ابنك المغوار
دمر قطار العدو
واستهزا بالاخطار
عبر القناة بالليل
فارس أسد مغوار
أسر لنا شمعون
جابه ذليل كالفار
شفى غليل الوطن
والحق والاحرار
دك المعدية ستة
أشعل صلفها نيران
راح أقول لك ايه عنه
عن سر حب الشهاده
اللى سرى ف دمه
راح أقول لك ايه عنه
وانا شفت ياما معاه
عن سر حب الوطن
اللى بحياته فداه
وف يوم كريم مفترج
لاقى الشهيد مولاه
كأنه يوم القدر
والحور دى ماشيه
وراه
وف يوم كريم مفترج
لاقى الشهيد ربه
وساب لنا جند صابر
ساير على دربه
بقلم /محمد على محمد حماد
المنيا-ديرمواس-دلجا
قصيدة من ديوان شهيد
التعليقات مغلقة.