الميزان… أحمد كريم

الميزان

أحمد كريم…..مصر

——————
وَزَنت رُوحَك؟؟
وطلِعت كام؟؟
وَلّا انت عايش والسَّلام
عِرِفت كام عندَك مَوَدَّه
وَأد إيه عندَك مَلام ؟؟
وأَد إيه جُوّاك طَيابَه
ولّا شايف الدُّنيا غابَه

والشَّر فيك سابِق أوام؟!

بالنِّسبَه يَعنِى للطعام
كان كُلُّه جاىّ من الحلال
ولّا فيه شُبهِة حَرام
والصِّيام…..
هل كان صيام؟؟
والقيام…..

ولّا انتَ كُنت مع النِّيام!!

أد إيه كان السُّؤال
عن قرايب أو جيران؟
إبتسَمت ف وِش أهلَك
وامّا صاحبَك جِه نَدَهلَك
لَمّا كان محتاج لصاحبُه
هل جريت لَبِّيت نِداه؟
ولّا كان دُورَك ساعتها
كان كلام!
إن كان ميزانَك كان لِصالحَك
إن كان ضميرَك كان مِصالحَك
تِبقَى عَدِّيت لامتحان
تِبقَى خَدت احسن شهاده
أحسن شهاده مَفيش كلام