رسائل البُعد بـ قلمي / أسـمـاء الـبـيـطـار
هنتكلم هنا عن العلاقات الحقيقة ، اللي في بينها روابط رسمية علشان مندخلش في متاهات مش وقتها دلوقتي و هنفرد لها مقال خاص .
لو هنتكلم مثلاً عن العلاقة بين الزوجين ..
كتير مننا بييجي في فترة و بيحس بملل ، من روتين الحياة ، و عدم التغيير ، و بالبلدي زي ما بنقول ” اللي نِبات فيه نصبح فيه “
و بنييجي في فترة و مبنعرفش نحدد مشاعرنا تجاه بعض !
و يمكن ضغط الحياة و الظروف و المسؤوليات بتخلي عندنا حالة من ” الخرس ” الزوجي ، يمكن لحد ما كل واحد فينا بيكلم نفسه ،
و مش فاهم إيه اللي بيحصل ، رغم الحب ، و العِشرة ،
و الولاد ، و ، و و .
لكنها مشكلة حلها بسيط جداً و يمكن كتير جربوه و حسوا بيه .
و هو الـبـعـد فترة من الوقت .
البعد الجسدي .
و البعد عن المكان بالسفر أو بأي وسيلة .
و حقيقي قوة المشاعر و صدقها بتبان في البعد ، أو العكس طبعاً .
و هنلاقي أزواج ما قدرتش تتحمل البعد بضعة أيام ، مُجرد إحساسك إن في حاجة ناقصة ، مش مكتمل ، مش مبسوط ، مش مرتاح .
رغم رتابة الحياة اللي ذكرناها ؟!
آه رغم رتابة و آلية العيشة لكنهم اكتشفوا إنهم حقيقي ما يقدروش يبعدوا .
و حقيقي بيبقى الإحساس متبادل .
عاوز تقول حب حقيقي .
و ليه لأه .
عاوز تقول طمرانه فيهم العِشرة .
بردوا و ليه لأه .
لكن فقط بنبقي محتاجين نختبر مشاعرنا من وقت للتاني .
و حقيقي في ناس مُجرد ما بتمشي من قدامك بتوحشك .
و طبعاً علشان نبقى منصفين وواقعيين .
في أزواج العكس تماماً
يعني في زوج مُجرد ما بيخرج من باب الشقة و لو هيغيب ساعات العمل ، أو عنده مُجرد مشوار و راجع .
بتلاقي البيت باللي فيه أخد نفسه ، و بقى في حالة إنبساط عجيبة !
و أكيد السبب بيرجع لسلوك الزوج في البيت ، مع الزوجة و الأولاد .
و هنا مدة الغياب مهما طالت هيحسوا إنه ما غابش ساعة زمن أو كأنه ما خرجش من اساسه !!
” صعب الوضع ده مش كده ”
لكنه للأسف موجود .
و لو هنتكلم عن صلة القرابة ، و الصداقة ، و الجيرة .
الأمور مش هتفرق كتير حقيقي .
لإن فعلاً بُعد ناس معينة عنك ، و رغم دوامة الحياة اللي بنعشيها
بتلاقي ” قلبك ” بيسأل عليهم
مشغول بيهم ديماً
ما بيروحوش من دماغك
بتفضي نفسك و تجري تخطف زيارة أو مكالمة
البعد ديماً عمره ما قلل من مقدار المحبة المتبادلة في قلوبكم
بتعذروا بعض ديماً .
” ناس جميلة قوي دي مش كده ”
و طبعاً العكس ..
ناس بتبقى قدام عينك و مش شايفها .
و أنا من الناس اللي عمرها ما صدقت المثل اللي بيقول :
” البعيد عن العين بعيد عن القلب ” !
في ناس بعيدة عن العين ، لكنها واخدة القلب معاها حتى لو في عالم غير اللي إحنا عايشين فيه ده ”
رسـائل الـبُـعـد
قوية و صادقة مهما كانت نتائجها .
فهل إختبرت مشاعرك ؟
التعليقات مغلقة.