حركة البيع و الشراء في حياتنا
بـ قلم أسـمـاء الـبـيـطـار
إيه العنوان الغريب ده !
و هنبيع إيه و نشتري إيه ؟!
البيع و الشراء تقريباً أساس حياتنا ، سواء بيع مادي للأشياء
أو بيع للأشخاص ؟!
و أكيد طبعاً عارفين لما بنتكلم في موضوع ، بنتكلم عن بعض النماذج اللي بنقابلها أو اللي موجودة في حياتنا .
يمكن قليلة و يمكن كتيرة لكنها موجودة .
و بنتكلم عنها ليه ؟
لأنها بتأثر فينا و بتغيرنا سواء تغيير إيجابي أو سلبي .
ندخل في موضوعنا ..
هنتكلم عن البيع المادي الأول و يمكن الشخصية دي هتلاقيها حواليك في كل مكان .
بعض الأشخاص اللي طلعنا وجدناها بتبيع شئ عندها علشان تشتري شئ تاني ؟!
المشكلة مش في كده ، المشكلة إنها ممكن تبيع أشياء ثمينة جداً و قيمتها مع الوقت بتزيد ، بأشياء لا قيمة تذكر لها .
زي اللي بيبيع بيت عيلة و يصفي تاريخ ناس و بيقلع جذورها من المكان ، علشان يشتري شقة إيجار جديد !
أو حتى يقدر يدفع إيجارها !
و ناس تانيه بتبيع ورثها اللي أبائهم عملوه بجهد و تعب ، علشان خاطر المظاهر !
و ناس مُجرد ما بتمر بزنقة اللي تقريباً كلنا ممكن نمر بيها ، بتدور على أي حاجة عندها تبيعها علشان تفك ضيقتها .
و المشكلة في الناس دي بالذات سيئة جداً جداً لأنها ممكن توصل لبيع ” عفش بيتها ”
أكيد أغلبنا مر عليه نماذج من دي و يمكن أنا ذكرت بعضها .
و طبعاً في ناس عكس كده تماماً
و بتصبر ، و بتقدر قيمة الأشياء اللي عندها كويس جداً
و مهما مر عليها من أزمات متأكدة إنها لو فرطت فيها مش هتقدر تعوضها .
و لو عوضتها مش هتبقى بنفس جمال و قيمة اللي راح .
علشان كده بتفضل متمسكه بيها مهما حصل .
لكن حقيقي أسوء بيع ، هو بيع الأشخاص .
و دا فعلاً مش بيبان إلا وقت ..
المواقف ، و الأزمات ، و الشدائد ، و كمان النزوات ، و مرَّات العند !
و يمكن حتى من غير مواقف تُذكر ، ناس طبعها الغدر
و يا رتها بتبيع ناس تقدر تعوضها !
أو هتلاقي نضافة قلوبها بعد كده .
دي ناس بتبيع للأسف الغالي بالرخيص .
و الطيب بالغدار .
في ناس حقيقي مالهاش عزيز و لا غالي ، و لا بتعمل حساب لقرابة ، أو صداقة ، أو جيرة .
المهم هي و بس
مصلحتها فوق أي شئ حتى و لو على حساب عِشرة سنين ، و أولاد و حياة كان فيها المر قبل الحلو و صبروا ، و أخرتها كان الغدر !
المهم إن المشكلة في النوع ده بالذات .
إنه ممكن يبيع مرة و إتنين و تلاتة و عشررررة .
عن نفسي الناس اللي قابلتها و إتعودت تبيع .
عُمرها ما عرفت تشتري ، و ديماً في خسارة مستمرة
و لكن ..
ما أصعب خسارة الناس اللي حقيقي عُمرها ما بتتعوض .
الناس حتى اللي بتشتري خاطرك ، و ما تقدرش تكسرك .
الناس اللي بتلاقيها في ضهرك منين ما تكون .
الناس اللي شارية عشرتك بالقمة كلتوها متغمسه بملح .
الناس اللي بتفرجها عليك بكلمة طيبة .
الناس اللي مهما بعدتم و مرت من عليكم أيام و سنين بتلاقيها زي ما هي ، و يمكن زادت جمال و نضافة قلوب .
و حقيقي قليله الناس اللي ليها نفس الوش من ساعة ما عرفتها .
اوعى تفكر تبيع حد شاريك مهما حصل .
لإن صدقني مش هتقدر تعوضه .
كان أهالينا زمان لما البنت يتقدم لها واحد مرة و إتنين
ينصحوها و يقولوا لها : خدي اللي شاريكي .
التعليقات مغلقة.