القلم
منصور عبد المقصود
رفض القلم يكتب حروفى
وأنا من كسوفى
قصفت سنك
نزف الوجع فوق الورق
أهدرت دمك
لو كان يهمك
كانت حروفك تشبهك
وتداوى جرح المكسورين
لكن عنيك
شايفة الحقايق كلها
ورافضه تكتب حرف حق
ولا مره قلت لظلم لأ
منتاش قلم
زارع فى قلب النور الم
عاشق تمجد كل زيف
يا قلم سخيف
تعشق تبيع حبر الوجع
كل اللى مستنى اتوجع
دمعة حروفك
تحبس بطل
تشنق مرابط ع الحدود
أرض الجدود
راحت بامضة حضرتك
حتى اليهود
الوعد كان من فكرتك
فكرة تموت الف جيل
وما زلت عايش ع الورق
يا أيها القلم النحيف خليك نظيف
فرحنى يوم بتمردك
رجع حقوق الميتين
داوى جروح المجروحين
كل الدموع النازفة على بحر الهموم
نازلة بتلعن حضرتك
التعليقات مغلقة.