حنين
منصور عبد المقصود
…..
ولساني
بحن اليك
وأحن كمان لجدرانك
هنا صليت
هنا غنيت
غناوي كتير على بابك
هنا عنباية مزروعة
ماليها الشوك
بتجرحنى
هنا ارضي اللي بزرعها
وهنا جارتي بتلمحني
وهنا بسمة بتتدارى
بشوفها والجبين محني
وأنا بزرع ورود الشوق
وبهديها لأحبابي
…..
هنا واقف على بابي
وبتكلم مع صاحبي
تعدي الحلوة بضفاير
اغمض عيني وادّارى
ورا خجلي
واقول بكرة هكلمها
اكيد لازم افهمها
انا المدبوح قصاد عينها
وعينها اللي دبحاني
انا اللي كتير بغنيلها
ولا مرة بتسمعني
…..
وهنا جارة تغازلني
تقولي عنيك تلاحقني
وانا راحة وانا جاية
وانا مكسوف أرد بأيه
دانا عمري ما اكون ليكي
لأني عشقتها هي
دي أجمل من بنات الحور
في عز الليل
يبات قلبي يناديها
يبات فكري يناجيها
تبات عيني بتتلمس خطاويها
واقول بكره تكون ليا
واكون ليها
وبكره الجاى مبيجيشي
ولو مره
نشف ريقي يا بنت الناس
وانا الحارس على المية
منصور عبد المقصود
التعليقات مغلقة.