زَفَّه

أحمد كريم

زَفَّه وفَرَح وعريس
وناس كتير مهاويس
واقفين علَى المَسرَح
وكَأَنُّهم متاريس
والفِرقَه شَغَّالَه
والواد ابو ريالَه
حَط النُّقوط فى الكيس
زَغروتَه يااهل الفرَح
وليلِتنا أحلَى خميس
والناس كتير ياما
والفَتَّه غرقانَه
لَحم ومَرَق بهاريز
بَس العَرُوسَه حزينه
هايجَوِّزوها ياعينى
من واد حَلَنجِى خَسيس
يقلب حقايق زيف
والزِّيف يشُوفُه حَق
ويصَدَّقُوه مَتاعِيس