السيرك
أحمد كريم
أصل الدنيا دي سِيرك كبير
وانا ماقدَرشى أكون بلياتشو
شوفت انا ياما فيها كتير
اللى بيلعب ع الحَبلين
واللى ف ثانيه يغَيَّر وِشُّه
شوفت الواطى واللى يطاطى
واللى بالِعها بحالها ف كِرشُه
واللى مَلوش فى الأصل ملامح
ولا تعرفشي أَفاه من وِشُّه
والمِتغَندَر المِتعايق
واللى بيضحك أبو بال رايق
شافُه حَسود إتغاظ واتضايق
آم بالنظره وبالعين نَشُّه
أصل الدنيا دي سيرك كبير
وانا ماقدرشي أكون بلياتشو
التعليقات مغلقة.