الجنود الطيبين بقلم محمد على محمد حماد
القصيدة الحائزة على المركز الرابع على مستوى الجمهورية فى شعر العامية
لساك بتسأل يا صغيري
ع اللى كان واللى حصل
عن فجر نور أرضنا
عن فجر فى الكون انتصر
عن بدر تانى
عن فتح من رب البشر
لساك بتسأل ع اليقين
وع الجنود الطيبين
اللى على مر السنين
رسموا ملامح حلمهم
بدمهم وعزمهم
لساك بتسأل زيهم
ازاى عبرنا وانتصرنا
وهزمنا أسطول الضلال
ازاى كتبنا بدمنا
احلى اسطورة نضال
لساك بتسأل ع النضال
وع الشجاع اللى عبر
سطح القنال
وهتف وهلل
الله اكبر الله اكبر
وهزم جنود الكفر
وجنود الضلال
لساك ولسه الكون معاك متحيرين
بس الارادة والايمان
مبيعرفوش المستحيل
والنصر منحة ربنا
للمؤمنين الطاهرين
التعليقات مغلقة.