إيزيس
معوض حلمى
وقعدت أخاطب عقلها
يمكن آلاقي دليل ياخدني لقلبها
لقيتها محتاجه الدفا / والخوف جبان
ولقيت حرس واقفين على كل البيبان
منعوا اللقا
وانا اللي دافع مهرها عنقود شقى
مانعين خيوط الفجر تطلع شقشقه
وحبيبتي عاشقه الغلبانين
العطشانين حب وقبل
بالليل باشوفها ملثمه
جوا الحواري المعتمه
بتلف تخطب ودهم شايله الدبل
مالهاش في أدوار الهبل
علشان صريحه وممتعه
بتهد كل الاقنعه
وكل التيجان اللامعه
وكل البدل
دلوقتي ليه ممنوعه تحكي
ممنوعه ليه ويايا تشكي
سابوني للأوهام وشكي
ناديت عليكي م الميدان
سدوا الفضا / بالصولجان
قالوا حرام الفضفضه
وطولة اللسان
وانا الحبيب اللي اتعمل
للخلق ميس
بازرع فواكه للبشر
واكل دريس
والهم شايله ع الكتاف
ومفيش ونيس
ولا فرح واصل
فين السبل ياإيزيس
فضيت خلاص الحواصل
لمي رفات أزوريس
معادش خير واصل
إبنك معادش بطير
حورس إله الطير
مجروح جناحه اتلوى
وانتي الدوا
قبل العشى وانتي النفير
وانتي الهوا
بعد العشا وانتي السمير
صحي الضمير
وانا بسألك
إنتي ليه بتعكي عك
رميتي زهرك
طالبه شيش وجالكي يك
ودايره ليه حوالينا لك
هو انتي إيه جايبانا شك
دا إحنا العيال الطيبين
فاتحين بيبان الدار حنين
ومنزلين الدمعه دم
هو انتي ام
والا انتي ضره وناويه غم
ساعات باشوفك أبهه زي المها
ماشيه الخطاوي بعزها
وساعات باشوفك زي مريم
صحيح بتول
فيكي الملامح آمنه
وملونه كل الفصول
وساعات باشوفك زي غول
صابني الذهول
ضحكتك ماعرفش ليا أو عليا
نظرتك كانت نديه
وكنتي حضن للهفتي
و خايفه عليا
سقتيني ليه مرك وجورك
رمتيني بالبهتان وزورك
ليه سهامك صايبه
بتشق اللي فيا
وانا لسه نيه تقوم عفيه
وحارسه دورك
…………………………….
بقلمي الفلاح الفصيح
معوض حلمي
منشأة بطاش
تمي الأمديد
دقهلية
.
التعليقات مغلقة.