مديحة بقلم سامح لطف الله
أنا سكري يدوب ع الريحة
يا سلام لو شفت مديحة
النظرة جريئة صريحة
وبتسقي حمامها إزاي
منقار في البق يدوق
تسكر حماماتها بشوق
وتطير وترفرف فوق
وانا قلبي رايح جاي
منك لله يا مديحة
الرمش فرشني دبيحة
والقصة مع التسريحة
والمغرب شرب الشاي
العطر يفوح بالريحة
وعيون تطرحني طريحة
دفستني ف قلب صفيحة
تجرحني ما لاقي دواي
منك لله يا مديحة
قررت اقلبها فضيحة
ف الشارع ع المرجيحة
ما تمدي الخطوة معاي
هعلنها قوية صريحة
أنا دايب فيكي يا مديحة
وهضحي بألف دبيحة
وجايب الماذون وياي
ارقص ويايا ياعم
وانت يا عزول اتلم
وبعزم الصوت والفم
انت يا مديحة هواي
التعليقات مغلقة.