ساكنين في نن العين
بقلم بقلمي الفلاح الفصيح معوض حلمي منشأة بطاش تمي الأمديد دقهلية
وصية الزواج للعروسين
الليلة ١١ – ٨ -٢٠٢٠
………………………….
انا بادعي يارب الفلق
بالستر ليكوا
يحميكوا شر من خلق
ويجود عليكوا
وتعيشوا مضرب للمثل
آمن وهدايه
وتكونوا في الخلق آيه
يتباهوا بيكو
الليله ليلة فرح
وانا في الحياة رحال
عروستنا نورها طرح
وعريسها واد خيال
النصح ليهم وجب
علينا فرض ودين
لتنين ميزانهم غلب
ساكنين في نن العين
بعد الصلا ع الزين
تحلى الحياه باللين
والبعيد تلقاه قريب
لو جاكي مره
في يوم مزعبب
خليكي في البيت الميزان
لو قال أبوكي
قولي له طيب
هتلاقي فيه الأصل طيب
ويجي مليان بالحنان
يمد إيد الخير يطيب
وان شوفتي يوم
حزن في عينيه
إفردي قلبك سحابه
وضلليه
مدى الإيدين بالطبطبه
خليكي نسمه قريبه
داوي اللي فيه
أصل البيوت الطيبه
عنوانها باين ع البيبان
لو ألف نوه مرعبه
ماتهزش المليان إيمان
والرحله دي كوكتيل شجن
فرح ومحن
خليكي دفه بتتشحن
وعدي بيه بر الأمان
وعشان بيوتنا المؤمنه
بتغلي اللي فيها
فاياك تفارق ضل بابها
وتخلى بيها
أحرس عتبها تلقى نهر
الخير ماليها
يروي حياتك بالهنا
وتعيش في جنه
تحصد مافيها وتتهني
حاجي عليها
هتلاقيها صاينه سرك
جوا دارك
وتلاقيها نسيم يسرك
وف مدارك
فاوعى تسمح للعوازل
يوم تغشك
هتلاقيها النور لوشك
وانبهارك
وشوفها بحر من الوفا
كالنبع صافي
ف الحر نسمه مهفهفه
ترمي العوافي
فطره وخلقها ربنا
والفطره نور
تطرح آمان الدور
والخير يوافي
والحنان بينك وبينها
فيفتي فيفتي
لو قالت لك إوعي بره البيت
عينيك تروم
هتقول لها ، وانتي برضه
تصوني غيبتي
دا البيوت عايزه الأمانه
عشان تدوم
وانا بادعي يارب الفلق
بالستر ليكوا
يحميكوا شر من خلق
ويجود عليكوا
وتعيشوا مضرب للمثل
آمن وهدايه
وتكونوا في الخلق آيه
يتباهوا بيكوا
…………………………
التعليقات مغلقة.