قلبي الحيران …
شيماء عادل
والله ما انا عارفة انا بهرب ليه
بهرب من نفسي وم الايام
واللا انا بهرب م الوجع الداكن جوه الروح
خَد مني حلاوة روحي وساب مر الحكايات
لَفْ الأوهام ف بواقي كلام
ونسي الايام
يا مسافر لم بواقي روحك
من ع الطرقات
واسرح جواك ببواقي الروح
اللي عدمتها من غير تفكير
قررت بجبروتك تبعد
وتسيبني اسير
طب لو مره سمعت القيصر
اسمع ( استعجلت الرحيل)
الخيط ملفوف
وانا جوه الخانه المكسوره
بسمع وبشوف
درويش بيحاكي ف خلق الله
متصاب بجنون
والعشق ف توبه امَرْ جنون
سارح بجنونه يلف الكون
بيدور علي عمره الباقي
ولا عارف يرجع
اهو ماشي يشرشر ف حكاوي
وانا غاوي وبسمع
كل اللي اتجننه من قبليك
دول كانو مجانين زيك بالظبط
ضيعو عممرهم ف الحواديت
وقعوا ف الفخ
وانا وانت يا درويش ليه ما تبناش
حابين نتجنن بزياده
والعمر يضيع مننا ببلاش
اشرب مُرَك والله ساده
درويش
بيعافر ف الدنيا
بيراضي حبيبه عشان يفضل وياه على طول
وحبيبه بيضحكله كأنه شارب مسطول
فرحان
والفرحة ماهيش سيعاه
عايش مِدَرْوش يا ولداه
وحبيبه بيهرب ليه فجأه
من حبه عملهاله مفاجئه
ما فرقش معاه
شيماء عادل
التعليقات مغلقة.