مليان بخوف
هنا سعد
مليان بخوف قلبه إنكسر
بايت حزين أبو البشر
آدم وحوا مرعوبين
الشر فى الدنيا إنتشر
شيطان وعايش وسطنا
وفى دمنا
بيجرى فى العروق
لسه يادوب بفوق
من وهم سماه الخلود
الاقيه بيدس سمه
فى الضنى
ويحللى فى عنيه
الجحود
وَهَمَك بإيه يابن النبى
أول نبى
خلاك جماد
مليان جمود
زيه تمام لما عصى
قلبه قسى
رفض السجود
……………………….
خلا أخوك فى عينيك
يهون
وفى غفلة منه قادر
تخون
لسه فى قلب الدنيا عايش
ولا ابنى تاه
وقدرت يابنى تقتله
وتنهى الحياة!!
وتقفل كتاب العمر
وصفحة وراه
كتبت فيها لأخوك
شهادة وفاة
………………………….
نعق الغراب بأعلى صوت
بيعلمك
ازاى تدارى عملتك
مش لعبه هى
ده أصله موت
وقدرت تبص لعين أبوك
قادر تفوت
خلص الحانوت
……….،..،…………….
دفن الغراب جثة غراب
وطار بعيد
وأنت دفنت الطيبة
فى بطن التراب
فكرك شريد
والدمع ملو العين
ولسه يا جوف
بدل الدفا مليان بخوف
…………….
والشر زاد
فتح مزاد
قرب هنا مين يشترى
حبة فتن
وظلم العباد
شوية رشاوى
ومحسوبية
لسه جداد
الشر قاد
ميت شرارة
فى النفوس
نصبوا العزا
وصوان كبير
للطيبين
خلص العزا
والقلب تاه
حاسس بخوف
بدل الدفا
مليان بخوف
التعليقات مغلقة.