” يقمص ويرفس “بقلم الفلاح الفصيح معوض حلمي
على نهج عمنا الفاجومي
أحمد فؤاد نجم
وعلى عموم البتاع
…………………………..
البتاع في الشعر جني
حبه منك حبه مني
هوبا أصبح نقبه شاعر
وبحروفي راح يغني
البتاع لو شد حيلو
يربطك دلدول ف ديلو
يعجنك ويلت عقلك
يخبزك من نوع نخيلو
البتاع له شكل خاص
يبعتك مشوار دماص
يطحنك زي الرحاية
يصلبك على سن فاس
البتاع طالع في حمله
له طريقه في المعامله
في المرايا تشوفه حوت
في الحقيقه يبقى نمله
البتاع رافع سلاحو
والبتوع م الهم ناحوا
مشيوا كالعميان ودخلوا
جوا نارو لما ساحوا
البتاع التالي ذكره
له دماغ مليان بمكره
وكل واحد له بتوعه
نفس نوعه ونفس فكره
البتاع لو قال بيهجص
ع الحبال يلعب ويرقص
زي جحش الدار قراري
تنخسه يقمص ويرفس
البتاع راكب وابور
قال هايبني لينا دور
قال هايزرع لينا بصلا
وهو أصلا أرضه بور
البتاع دا لسان طويل
زي صاحبه واد عويل
ع الجنيه بتبان هايافته
تنزل ريالته ، يهز ديل
البتاع خايب حسابه
لما عقله هج سابه
دار يهلفط في الخلايق
والشرف طلق جنابه
البتاع مسكون بطمعه
مش مكفيه اللي جمعه
كرشه واسع زي بحر
بكره يشكي الحال بدمعه
البتاع أستاذ كلام
طبعه واخده م اللئام
بس مين ع الحق شاطر
والحقوق عايزه إلتزام
البتاع ده شيخ همام
لو تشوفه تقول إمام
في الجوامع له مكان
في المجالس مش تمام
البتاع بقى ع المشاع
هو واحد فينا باع
وكلنا بتاتيع بنسعى
وكل مسعى وله قناع
البتاع في القبر نام
والبتوع حواليه نيام
بس مين في الجنه دار
ومين في دار النار قيام
البتاع في الحاره لص
ع البيوت شمشم ودس
و الحيطان بتداري ناسها
بس هو شيطانه عس
البتاع وقت الخلاف
يقسمك خلفين خلاف
يتولك ويشل عقلك
يخرسك ولاحد شاف
البتاع ع الفرض يجري
لو تشوفه تقول دا مجري
الأصول والشرع داسهم
في الحقوق ينكت ويهري
البتاع له ألف لون
جوا عقلك له عيون
يصلبك تور ع المدار
يطحنك صرصار في هون
البتاع دا ألعوبان
في الزعل على أصله بان
باع أصول العشره بيع
بان وضيع مالهوش امان
البتاع لو كان صديق
جربه واعمل غريق
تلقى إيده مخاصمه إيدك
يجرحك يرميك ف ضيق
البتاع ع الجسر سارح
لما شاف الزرع طارح
سنبلات مليانه جود
بان حسود العين وجارح
البتاع بيشيل بتاعه
نيته من نوع متاعه
فعله لازما يوم يجره
خيره شره من دراعه
…………………………..
التعليقات مغلقة.