عمل مشترك ثلاثي الأبعاد والإبداع

عمل مشترك ثلاثي الأبعاد والإبداع

بدأه عمنا الغالي .. الشاعر عبد الشكور ضرار

وتبعه الساحر .. الأستاذ سعد الشرقاوى

ومن وحي إبداعهم كتبت انا الفلاح الفصيح
معوض حلمي شاعر عامية

المبدع الملهم .. عبد الشكور ضرار

بريه يادنيا ارحمي طلـــعتي عين أهلي
رامياني وسط الهموم والفقر جايباهلي
يعني أشق الهدوم يادنيا م اللي انا فيه
حرام عليكي بقي ,إيه تاني عينــاه لي
…………………………………………….

الساحر.. سعد الشرقاوى

بقالي خمسين سنة باستنى فيك ما تجيش
عامل عليّه لواء وانا طول حياتي شاويش
يا حظ عيب اختشي وتعالى يوم معدول
خايف احلل بول يطلع عليه ورنيش
…………………………………………….

الفلاح الفصيح معوض حلمي

بقالي خمسين سنه باحلم بحتة نيش
يابخت مالك كدا دايما تروح ماتجيش
كان نفسي اعمل جهاز يملى إوض الدار
لكني حتة فأر باكل بسيس ودشيش
……………………………………………

الساحر .. سعد الشرقاوى

سألت مرّه النكد هاتروح معايا لفين؟

والفقر عقده انتهى ومجدّده بسنتين

أتاريها حسْبه وشايلهالى بأثر رجعى

بيعيد معايا قرف منهى سنة الفين
……………………………………….

الفلاح الفصيح معوض حلمي

نزلت دموع العين وشقت الخدين
وانا اللي عشت آمين ولقمتي بالدين
باسدد الداينين من عرقي ومن همتي
ماملكش غير هدمتي ولباس وكلسونين
…………………………………………..

الساحر .. سعد الشرقاوى

يامفرّقين الأمل اليأس ليه كومى؟

داخل معايا ف عمل ملازمنى طول يومى

اضحك يروح زعلان وياخدنى بالاحضان

باين عليه عريان مشاركنى فى هدومى
……………………………………………

الفلاح الفصيح معوض حلمي شاعر

مال الزمان ومعادش فيه بشرى
الجهل .. مدد .. فينا .. واستشرى
الرقص أصبح دين والدين بيطوح
ياعمر يامروح خدلي العزا في بكره
……………………………………………

الساحر .. سعد الشرقاوى

طلبت حظيّ ف أجازه قال بلاش ياجميل

عمْرك عزيز عندنا يعنى مالكش بديل

دا انت واحد منـّنا ..بنآمْنه على سرّنا

لو غيبت يوم عنـّنا حانجيك فى عز الليل
…………………………………………….

الفلاح الفصيح معوض حلمي

آمن ياخلي برزقك ، وهدي تأويلك

زي اللي ضاع منك لابد هايجيلك

دنيا دنيه قوي وزينتها خداعه

عشان تنول الشفاعه إثبت على دينك