حكاوي الليل بقلم شيماء عادل
بيغير ف ملامح قلبه
بيحيد عن كل جهات الحب
و فاكرني هصدق من غيبته
ان انا خسران
وانه ما يوم حب
هتغيب ما تغيب
وابعد لسنين
خسران قلبك
هيروح على فين
أسند قلبك ببواقي كلام
كان بينا ف يوم
وافتكر ان القلب الخسران
مش شرط يكون اللي ما حبش
بُعدك بقرار
وانا قلبي مضطر يطنش
عشان اقدر اعيش
بنجازف بقلوب غلبانه
بنسيبها تشر الحزن
ف نص العمر المتبعتر
ف حكاوي الليل
بتسيب الخيط المتسرسب
يحضن ف رقابنا
يزيد العمر شقا وجنون
بتسيب الصبر يطوحنا
ونلف معاه
بتعاند على قد ما تقدر
وتعافر لجل تبان راضي
وانا واثقه انك أضعف مني
وبعادك كان أكبر كدبه
الشمس بتلمع وتنور للكل طريق
وف وسط النور بنضل طريقنا
لما الضلمه تسكن جوانا
بتغمي عنينا بنتوه السكه
التعليقات مغلقة.