لون الدمع واحد لكن ـ
أسـمـاء الـبـيـطـار
و ف يوم ناديت أمي بأعلى حسي قبل ما الدُنيا تعلمني
قولتلها تعالى بصي شوفي الست اللي هناك
- مالها يا بنتي ؟!
الصبح كانت في عزا فلان كانت بتبكي كأنه حته منها !
و دلوقتي زي ما إنتِ شايفة قاعدة في فرح بنتها
و نفس الدموع نازله تجري مِنها ؟! - ردت أمي بكل حزم .
سيبي الناس في حالها و إدخلي .
و بكرة تعرفي إن لون الدمع واحد
و كل واحد في العزا قاعد بيبكي على حاله .
على اللي راح منه و على اللي جراله من بعد منه .
طيب و الفَرح ليه يا أمي فيه الدمع ؟! - في ناس يا بنتي بتفرح بعد غُلب
و من فرحتها بتبقى مش مصدقة إنها قابلت و لو يوم
ينسيها اللي كان و كل الكلام وقتها بيروح منها
و مبيبقاش حيلتها غير الدمع . - و نصيحة مني ليكِ يا نور العيون
لما تشوفي الدمع في أي عين
إبقى إدعي لصاحبها ربنا يهون عليه أو ربنا يتمم عليه .
/ مُجرد خاطرة /
التعليقات مغلقة.