قصة قصيرة”جواب من بلاد بره” بقلم احمد يوسف سليم

قصة قصيرة”جواب من بلاد بره” بقلم احمد يوسف سليم

بسم الله الرحمن الرحيم
والصلاة والسلام علي أشرف المرسلين سيدنا محمد النبي الأمي الأمين………..
أما بعد…………
بعد التحيه والسلام نبدأ بقي الكلام .. يحدثكم الأن
الحاج/ إيهاب عبدالسلام
أحب اعرفكم إني بخير وبصحه جيده ولا ينقصني غير مشاهدة وجهكم الكريم،
الأول أسلم علي أخي الكبير سمير أبو عبير كتيرالسلام أنت عامل ايه ياكبيرنا؟ خد بالك من نفسك وصحتك وسلامي لأهل بيتك كلهم، أما السلام التاني ده خصوصي قوي لست الحبايب أمي الحبيبة، وحشتيني ياست الناس يا أم قلب مليان رقه وإحساس متبخليش عليا بدعواتك يا غالية، وسلامي لكل واحد في البلد بيسأل عليه بلغوه مني السلام، ودلوقتي بعد إذنكم، الفقرة اللي جاية دي لأم العيال، إزيك يا أم حسن
وحشاني قوي يابت، العيال عاملين إيه إنتي ليكي سلام مخصوص قوي، علي فكرة أنا بعمل زي ما قولتيلي يابت بحوش الفلوس علشان نشتري نصيب خواتي البنات في الأرض، بس أوعي تجيبي سيره لحد، وابقي سلميلي علي الأستاذ أحمد، زمانه هو اللي بيقرأ الجواب ليكم، والسلام ختام الراسل الحاج إيهاب عبدالسلام،…..
لم يمر سوي أيام قليل وتقف سيارة نصف نقل، وينزل منها الحاج إيهاب عبدالسلام العائد من العراق يسلم علي الأسرة وعلي الجيران،
وينزل مروحة توشيبا وتليفزون14 بوصه ناشونال وبطانيه صوف وعجلة وتسجيل وباجور غاز وكلوب وكشاف يدوي يعمل بالحجارة وشنطه كبيرة بها ملابس وأغراض أخري…. وبعد الترحيب والتسليم من أهل القرية والأصدقاء وتوزيع الهدايا جلست أم حسن مع زوجها الحاج إيهاب وسألته أمال أنت جيت فجأه كده ليه ياحج، رد الحاج إيهاب أنا عملت مشكلة مع صاحب الشغل وحجزت ونزلت علي طول بس إسمعي أنا عارف أنه مش هيقدر يستغني عني،ده لو لف الدنيا بحالها مش هيلاقي زيي وبكره تشوفي!!، أنا سايبه بيلف حوالين نفسه مش بعيد يجي ورايا البلد يترجاني أرجع الشغل، إنتهي الحديث وفي اليوم التالي وإذ بساعي البريد ينادي جواب من بلاد بره يا أم حسن بس متنسيش الحلاوه وإنتي جايه،. نظرت أم حسن لزوجها الحاج إيهاب مبتسمة هو انت ياخويا مكشوف عنك الحجاب تقول بكره يجي الجواب بكرة

ابتسم الحاج إيهاب في تعالي وغرور مش قولتلك ميقدروش يستغنوا عني روح ياد يا حسن نادي الأستاذ احمد يستقرئ الجواب أنا سايب صاحب الشغل بيلف حولين نفسه….
جاء الاستاذ احمد وعندما أمسك الجواب ابتسم وقال أنت ادري مني بالمكتوب يا حج إيهاب أنت وصلت قبل جوابك!!!

“جواب من بلاد بره”