ليل خارجي بقلم مدحت رياض

ليل خارجي بقلم مدحت رياض

المشهد يشبه ليل خارجي
والرمل وكاشفاه قمراية
يتخبى بضلة شجراية
ويلملم همه في أوراقها
البرد من الحلم سرقها
فانتحرت قهرا في الشارع
الفجر هيستنى وراجع
والريح كما نوبة انذارك
الليل خواف شكل نهارك
بتأجل دايما افكارك
وبتزرع حلمك ع المية
الفجر مقرب كالمارد
والليل بيلملم في نجومه
وبطلنا بيظهر كالشارد
والكل معاتبه وبيلومه
فتحس المشهد كان ناقص
فنعيد كلاكيت ٢٠٠ مرة
والجمل المتعادة المُرة
بتعدي وتسرق في الصورة
فتروح للساقية المهجورة
وتجمع في حوار ومعاني
والليل كما ناي بس مسافر
بيلحن للغربة اغاني
وبحسك واقفة وسامعاني
والكاميرا تلف ف زوايانا
تظهر مارونيت ومكسورة
في الليل وخيوطه وبتصارع
والصمت مساعد بسكوته
فالقلب بيتجلجل صوته
وبيملأ في مشهد كان جامع
كما شئ م الخوف يلمس قلبي
فيحسك اوقات كما ذنبي
ومجاش الوقت لغفرانه
الفجر بيفرش الوانه
مع ان المشهد ليل خارجي
فالكادر ف لحظة يبان كامل
والزوم على ركن ف أركانه
قبطان والمركب غرقانة
مع طير بيغني لسجانه
والليل استسلم بسهولة
ونجومه الخالية من الحيلة
في الفجر بتصبح مجهولة
الشمس بتسبقها طبولها
وبيهرب قدامها سكوني
الكاميرا تركز في عيوني
وبتنهي المشهد مع دمعة
تتحول لطوفان ومواجع
الفجر ازاي اصلا راجع
مع ان المشهد ليل خارجي