مابين تعجب و استفهام شعرجيهان النجار

مافيش تركيز ومش عارفة أعبر حتى ف اشعاري
انا شاردة غلب غلبي وضاعت مني افكاري
خلاص خلصت صبري عليك وجفت كل آباري
بقيت بشحت دموع الفرح
واكدب بيها اسراري

*بقيت بكدب على نفسي وع الأيام
انا محجوزة فى الماضي
وفاقدة بدل احلام
وبأخد حقي م الدنيا
بحباية اخدها وانام

وكل كابوس يزعجني
ااقوم مهزوزة مش شايفة
ويخبطني سكات وكلام
تروح روحي ف غيبوبة
لا انا طايلة ضمير مرتاح
ولا توبة
ولاقي يافطة
مكتوبة بقالك كم سنة تايهة
يبان الشيب فوق الجبهه

اسيب الأمر للمكتوب
وللسالب. وللمسلوب
وكمل عمري بتعاقب
مابين تعجب !!! واستفهام ؟؟؟