قسمة و نصيب بقلم مها الخواجة
نصيب وربك حكم
ودي حكمة م الخلاق
كاتب نصيب اللقا
مين انكتب له وفاق
والعشرة لو تنقطع
يبقا نقول يا فراق
واللي نصيبه انكتب
يكون يمين بطلاق
لا هو شيء هيعيب
ولا علة في الأخلاق
يا خلق ليه تجيبي
في سيرتي بالعاطل
إزاي في شرع الله
بتفتوا بالباطل
ده شرع ومحلله
ولا احنا هنماطل
والحكم للي انكتب
وده شيء مفيهش خناق
كتب النصيب قسمتي
ورضيت أنا بيها
والقسمة لو تنعكس
مين ينحشر ليها
بتنسلوا ف فروتى
وتقطعوا فيها
وتنتوروا ف جتتي
وتوزعوها اشلاء
في الراحة والجاية
شاغلين بي ليه بالكم
بالظلم ليه تحكموا
وتذيعوا احكامكم
سيبوني للي انكتب
وشوفوا أحوالكم
لا يهمني حكمكم
ولا عايزة منكو نفاق
وتطفشوا الخطاب
وتقولوا معيوبة.
فاكريني هسكت لكم
على أمري مغلوبة
والله دي الأخلاق
في نفوسكوا معطوبة
دي القسمة من ربنا
واهي كلها أرزاق
نصيب وربك حكم
ودي حكمة م الخلاق
……..
التعليقات مغلقة.