حكاوي سمسمة “من نظرة عين”
بـ قلم أسـمـاء الـبـيـطـار
و ف يوم دخلت علينا جارتنا فلانة
الكل قام من مكانه إتنفض، إلا أنا عملت عبيطة و مش واخدة بالي ؟
بصتلي ستي أم أبويا بصة خلعتني من مكاني .
و ف جلدي أنا دوبت و كأني أخدت منها مية قلم و عصايا .
و قمت من خوفي و كسوفي ، و أنا قايمة عيني غصب عني جات في عينها .
لقيتها هادية ، و بتقولي بعينها ، واجب الضيفة يبقى هنا ف دقيقتين
طرت من قدامها و ف لحظة ” كانت الجودة بالموجودة “
آه ما دا كان طبعنا زمان ، و يا رب البيت ما يكون فيه إلا كوباية الشاي بنقدمها و إحنا مش مكسوفين ، و لا بنجري نجيب و إحنا ممعناش ، علشان نبان قال إيه مبسوطين .
المهم ..
أخدت الضيفة قاعدتها و قامت ، و خوفت أنا أطلع لستي من نظرتها .
و قبل ما أخلص الكلمتين ، لقيتها بتقول لأمي إندهيلي الحلوة بنت إبني تييجي هنا لحد عندي ؟!
مُت أنا في جلدي و يا مين يخلصني ؟
قعدت بيني و بينها أد شبرين .
و ببالها الطويل قالت :
أنا ما بكررش النظرة مرتين و أسألي حتى أمك و من قبلها عماتك .
مفهوم الكلام يا نور العين .
و من يومها الكلام ما تكررش ، و يمكن كان ليها الفضل ، إن لغة العيون عندي بقت كتاب مفتوح !
و بقيت أفهم من نظرة عين .
و إلى لقاء أخر مع حكاوي سمسمة ..
التعليقات مغلقة.