ومين فينا كان فرحان

شعر/ جيهان النجار

مين فينا كان فرحان
ماغرقشي ف الأحزان
قال للحنين توبة
رجعت كده ف غفلة
قال م الغشم ٠٠ضحكت
ضحكت عليه السافلة
طال نومه فى الروبة
مين فينا عاش مرتاح٠٠ مين فينا عاش خالي
زى السحاب بيطير مطلوق كده وعالى
الفرح ملك إيديه
والحظ قدامه بيدوس عليه برجليه
مين فينا يوم لامه

ايه فايدة الدنيا
لو الوجع ببلاش
شال طينها فوق الراس
وازاى كده تتعاش
والعمر يدوب ليلة
يدفع تمنها كاش
فى لحظة بتعدي والباقى كله ما عاش