ألبوم صور…
بقلم :إبتسام عبد الصبور
ألبوم صور،،
في ألبومي صور شابِت
و قصة م الشروخ دابِت
و دمعة فوق بيبان الروح
لا سابت لي الكتاب مفتوح
ولانزلت ولا غابت
دي صورة وردة في عيدها
بدم الروح رويناها
قطفها الموت على عودها
و راحت روحي وياها
و لو ناسياني .. ذكراها
كما النوَّة على قلبي معديَّة
بلاش ديَّه
دي صورة حلم كان مايل ومتجرَّح
و لبلابة عذاب طارحة
و ليها في العيون مطرح
و قلب كسير يادوب شايفُه
و مليان شخبطه وخرابيش
و اهو متشال على رفُّه
كما زمنُه تمام واقف
و مابيمشيش
و بين الغيمة والغيمة بيتمرجح
تمزَّع فيه بيبان الريح
مابين الروحَه والجايَّة
و صرخة موت مدويَّة
بلاش ديَّة
و دي صورة ومقلوبه باخاف منها
زمان كانت في وسط اللمة بتزينها
و فيها قلوب عشقناها وضمتنا
ملايكة فى الغيوم حامت
وياما نورت بيتنا
و عدَى العمر وياها كمس الريح
و اهي سابت يادوب صورة
و روح دايبة ومكسورة
وعزم جريح
وُجُوه في الضل منسيَّة
لا سافرت بينا وياها
ولاعرفناها فين هيَّ ؟
بلاش ديَّة
صور مفتوحة ع الذكرى
و شادَّة الروح لـ 100 فكرة
عيون طالَّه على الماضي
و إيد ممدودة ع الفاضي
لاطايلة م اللي فات نظرة
ولاضامنه تعيش بُكرة
مافيش ثابت ولا معلوم
و بكره تشوف انا وانت
هانصبح صورة في الألبوم
فسيب الشهقة مخفيَّة
و خلي الصورة مقلوبة ومنسيَّة
بلاش ديَّه
و بلاش ديَّة
و بلاش ديَّة
التعليقات مغلقة.