دنيا الغلابة بقلم أبوشمس سالم
دنيا العجايب فيها حلم وصوته غايب
توهنا فيها وضعنا من بين الحبايب
صوت حزين يعزف حكاوي من الغرايب
الف وعد من المحبة وخيطه دايب
آآه يادنيا والف آآه من العجايب
كل صاحب فيها حالف يبقى خاين
مهما تخلص مهما توفي للزمن
من الهموم تعيش جريح من غير تمن
جينا روحنا كلها محسوبة يابا
دنيا حكمت حكم ظالم ع الغلابة
من الدموع تطلب رجوع تديك زيادة
وكل فرح فيها مر طعمه ساده
آآه يادنيا والف آآه على الغلابة
ضحايا عاشوا كأنهم تايهين في غابة
رغم الآلم على الوشوش معنى إبتسامة
تقرا فيها الف ويل بدون كتابة
ليل طويل فيه النجوم هيَّ الوجع
والقلوب منها المحبة بتتنزع
عايشين في دنيا كل شئ فيها الجشع
وابن آدم فيها تايه من الطمع
آآه يادنيا والف آآه من القدر
تدي الآمان وفجأة بيك بيتغدر
وكل شئ جوانا مات
وكأن فينا القلب مصنوع من حجر
التعليقات مغلقة.