سد العلم بقلم سامح لطف الله
التعليم في التابلت
مش ف الراس
ولا عاد ينفع سطر كتاب
ولا عاد نافع ولا عاد شافع
سطر اتشخبط ف الكراس
حادي وبادي
كرنب زبادي
يلا اختار خلصنا خلاص
نشن نشن انت الفالح
واضرب طلقة في عينه رصاص
ولا منقلة ولا اقول حنجلة
ولا مسطرة ولا لخمة راس
علم ديليفري لحد الباب
من غير ورقة وفتح كتاب
اصل وزيرنا استغفر تاب
لمس الورقة يا ناس مكروه
خليك نت وتت التت
والحق لاغي الواد والبت
قبل ما عقلك يا ابني يشت
سيب العلم لمين خبروه
قفل صورتك ف البرواز
جسمك هش وعقل ازاز
يلة اتفسح ف الالغاز
سد العلم خلاص كسروه
التعليقات مغلقة.