كفرت بكل احوالك…رضا علي أحمد أبو شنب
الاسم رضا علي احمد ابو شنب
المنصورة ميت غمر
قصيدتي الجذيذة
(كفرت بكل احوالك)
قصيدة عاميه
كفرت بكل احوالك
ومالي لما كان مالك
كفرت بشعرك الابيض
وليلك لاسود الحالك
وانا والمر جوايا
بقولك روحي ابقا لك
كتبت الشعر علشانك
وبوزن نفسي بميزانك
بحب عنيكي في الضلمه
وبسمع حتى بودانك
بحس بدقتك يامه
وعايش جوه فنجانك
ووسط الهيصه واللمه
بقولك يامه خدامك
بلاش يامه تحاسبيني
وحاسبي كل من خانك
ومين خلاكي ترميني
ومين قطع في اوصالك
بتسقيني دموع عيني
وانا في الأصل خيالك
قوليلي يامه فين عمي
ومين يبقى البعيد خالك
بشيلك جوه في النني
وهو يعيش على مالك
بلاش يامه تعاتبيني
وعاتبي كل عوزالك
ولو هتحاولي تحكيلي
قوليلي يامه فين شالك
قوليلي يامه فين دهبك
ومين بيهز خلخالك
قوليلي ياََمه لو فاكره
في وقت الشدة مين شالك
مابين التوتة والساقية
بيطلع منها موالك
بشوفك في الوجود باقيه
ياغاليه وربنا زادك
بحبك وانتي مش رايقه
بحبك وسط عوزالك
ومهما تكوني مضايقه
بقولك يامه محتاجك
واسيب الهيصة واللمه
واقولك يامه خدامك
واقولك يامه لو فاكرة
في وقت الشدة مين شالك
في وقت الشدة مين شالك
التعليقات مغلقة.