راجعة لبيت ابوها
أسـمـاء الـبـيـطـار
قبل ما ندخل في موضوعنا و علشان نبقى منصفين خدوا عني في أي موضوع بنتكلم فيه جملة
إلا من رحم ربي لأن اكيد الدُنيا لسه بخير .
ندخل بقى في موضوعنا اللي مافيش عروسة و لا ست بيت يمكن بقلها ربع قرن متزوجة و ما سمعتش أو بتسمع الكلمة دي .
فطار و غدا و عشا و اكيد أنا من ضمنكم
أكل أمي ،، انتي ما بتعرفيش تطبخي ،، مش نفس الطعم
ناقص ،، زايد ،،
و تقريباً كل لقمة وقفت على حيلها بتسد نفسها و بتكسر بخاطرها
و هي يا دوب لسه في سنة اولى جواز و مطبخ و مسئولية و و و
و اكيد هي ليها ماما بردوا و بشتاق لأكلها .
الدُنيا اتغيرت كتير عن الأول حتى في نوعية الأكل اللي دخل بيوتنا
زمان كان الأكل تقليدي جدا و اكيد كلنا عارفينه .
فبعد التقدم ده و قنوات الطبخ دي كلها و مش هتعمل شوية طبيخ
نعمة الحمد لله .
بس هي بتبقى داخله دنيا جديدة عوزة تجرب كل حاجة في بيتها
و تعمل احسن حاجة علشان تسمع منك كلمة حلوة
علشان تحس انها في بيتها اللي لسه بتبني اساسه حتى على اللقمة اللي هتجمع ما بينكم بالكلمة الطيبة و جبر الخاطر .
ما يمنعش إنك تجرب و تقول رأيك بس من غير سد نفس .
الموضوع عند ناس وصل لمرحلة مشاكل عائلية لمجرد إنها ما بتعملش اكل مامته .
بتسيب البيت بحجة انها ما بتعرفش تطبخ .
و بدون مُبالغة ممكن يوصل للأنفصال من تحت راس طشة ملوخية مثلاً و كلمة من هنا و كلمة من هنا و الدنيا بتقف !!
الغريبة بقى انهم بيكلوا من بره و على قلبهم زي العسل
طيب نقول الحل .
إن اللي يقدر ما يتعبش و إنك بتاكل في مطعم مثلاً
و اكيد يا ست الستات مش هسيبك زعلانه و هقولك بكره يبقى عندك ولاد و يقولوا ما بنحبش ناكل إلا من ايد ماما .
الحياة بسيطة و مش هتقف على لقمة
.
التعليقات مغلقة.