ورجعت لكم بقلم جمال زكي عينر
ورجعت لكم انا من تاني
ورجعت لكو بأحلى اماني
ايوه صحيح قلبي بيوجعني
خارج م المستشفى بعاني
لكن برضه حقول ايه يعني
وماعنتش راح اقول آه ياني
ورجعت لكم عايز انسى
كل مواجعي وكل آلامي
يمكن كلمة جميلة وهمسه
تسعدني تجدد احلامي
على شط الحب اعيش وارسى
ولا خلاص راحت ايامي ؟
ورجعت لكم يمكن الاقي
حد على العشرة يكون باقي
برضه اكيد الدنيا بخير
والعطشان راح يلقى الساقي
مش راح اغير خط السير
وحاكمل في الجزء الباقي
ورجعت لكم عايز افرح
والحزن ما يبقاش له مطرح
نفسي اشوف الناس مبتسمة
ومفيش كلمة بتأذي وتجرح
والكل يكون راضي بالقسمة
سوى راح يجمع او راح يطرح
التعليقات مغلقة.