من مذكرات تلميذ ملايكه بيييض
قلم معوض حلمي منشأة
فاكره مكر البت نوسه
لما سرقت سندويتشي
كنت لابس يومها كوتشي
كوتشي م النوع البلاستيك
والشنط في إيدينا آستيك
فاكره لما في يوم لمستك
روحتي ماشيه واتقمصتي
خوفتي يومها من طفاصتي
لما شوفت دراعكي ساب
من دراعي وشعري شاب
فاكره كشكول الحساب
والكتاب ع التخته سارح
مني ليكي / جاي رايح
في الفصل وف درس القراءه
تكتبيلي كلام عليه
حلو وف غاية البراءه
بس حست مس عبير
فاكره موضوع التعبير
عن ورد طارح بالعبير
وانتي قاعده بعيده عني
بس عايزه تغشي مني
مانتي عارفه الشوق ملاني
وعارفه إن حروفي ليكي
وإني هاكتب عن عينيكي
وإني هابقى الأولاني
لاجل شوقك يوم يفيض
يحتويني وانام ف ضله
كنا ورد الدنيا كله
من عبيره كنا فله
وكنا زي ملايكه بيييض
وكنا زي ملايكه بيييض
التعليقات مغلقة.