ناره الحاميه بقلم معوض حلمي
جاي ومعايا وابور الجاز
كانت كوشته نحاس لميع
كان بيناكيفني وبالألغاز
كان كباسه الجلد فظيع
كنا بنعمل شاينا عليه
ويدفينا في ليل البرد
كنا بنصحى ونمدح فيه
كان بيلم العيله بجد
كان بيسوي لابويا قوالح
وكان بيسخن سيخ الجوزه
لاجل يضيف عيسى وصالح
كان بيغيتنا ف وقت العوزه
آه لو صادف حلة محشي
كات بتفور من ناره الحاميه
وأمي الدايره مابترتاحشي
خايفه لا يحرق ليها الباميه
وماقولكش عليه لو شط
كنا بنسمع صوته يغني
لما بيحضن حلة بط
واحنا نرد وراه ونغني
ولما يعدي كمال يسألنا
كنا نقول له دا عال العال
كان دكانه ف وسط بلدنا
جنب زريبة عمي هلال
كان بيحمص عيش القمح
ياكل عمي وخالتي الجاريه
وامي الضهر بترمح رمح
وبتشوي لنا العصر بساريا
واحنا وابورنا ميه الميه
والحماله حديد جبار
شايله الطشت ملان بالميه
لاجل نحمي عيال الدار
ولما بيكتم أو بيزرجن
تلقى الإبرة تسلك زوره
يرجع تاني قوام ويدندن
تفرح حلل الدار وتزوره
فاكر لما هبابه يزيد
تلقى الحله سوادها غطيس
عايز جازه تملي جديد
لاجل النار بحمارها تهيص
التعليقات مغلقة.