مش هيجيلكم نقص سكر
بـ قلم : أسـمـاء الـبـيـطـار
كتير مننا إن ما كنش معظمنا الدُنيا باللي فيها مش مخليانا عارفين نبص تحت رجلنا بقينا نقع و نقوم من غير من نعرف ايه السبب
و بنفض هدومنا و نكمل مشي عادي .
ولاد و بيت و عمل و دراسة و ظروف مادية و كل حاجة في الحياة ممكن تتخيلها بتمر على أي حد فينا
إحنا كبني آدمين بنتحمل ظروف تهد جبال بالكلمة الحلوة آه و الله ما تستغربش الكلمة الطيبة دي و تطييب الخاطر بتخليك بني آدم تاني خالص
بتخليك تمسك في الدُنيا بأديك و سنانك
بتخلي عندك امل إن بكره احسن
بتخلي روحك قادرة تكمل رغم كل الظروف اللي بنمر بيها
و اقصد كلمة روح لأن الإنسان طاقته بتبقى من الداخل
من كلمتك الحلوة اللي مخزنها جواه
من تطييب خاطرك لو حاجة كسرته بيقدر يقوم تاني و يكمل
لجل خاطر عيونك و عيون كلمتك الحلوة .
الغريبة بقى و على بساطة الكلمة
في ناس كده تحس إن هيجلها نقص سكر لو قالتلك كلمة حلوة
تحس كده انها لو راضت حد هيطمع فيها
أو إن هيبتها هتروح مثلاً .
الكلمة الطيبة دي يا جماعة صدقة و صدقة جارية كمان
كفاية إن اللي بيجُبر بخاطرك بتفضل فاكره بدعوة طيبة كنت من اهل الدنيا أو من اهل الآخرة
الكلمة الطيبة صدقوني صاحبها لا بيموت و لا بيتنسي
ارحموا بعض بالكلمة الطيبة لأن فعلاً الدنيا مش مش ناقصة
إننا نهد في روح بعض .
التعليقات مغلقة.