دوس ع الجراح …
جمال زكى عينر
دوس ع الجراح
عمر الجراح
ما تخف الا بعزم وصبر
دوس ع الالم
تلقى الالم
يهدى ويبقى اقوى من الصخر
انسى اللى فات
عمر اللى مات
ما هيرجع بعد دخوله القبر
عيش الحياه زى ما هيه
خد منها قبل ما تهلكك
اوعاك تاخدها بحنيه
اتعبها قبل ما تتعبك
اصل الحكاية انها دنيا
فانيه لا يمكن تنصفك
عيش فيها ايامك الجايه
اغلبها قبل ما تغلبك
واجه الصعاب
والصعب لو كان الف باب
افتح وخش ولا يهمك
هش الكلاب
حارب الدياب
وحتى لو هيسيح دمك
اوعاك تلين او تستكين
او يوم تطاطي وتتنازل
خليك متين شد الوتين
في الحق دايما كون عادل
آخر الكلام
خير الختام
اسمع كلام الاكبر منك
حيفهموك
ويعرفوك
حاجات كتير بتفوق سنك
بقلمي الشاعر جمال زكي عينر
التعليقات مغلقة.